فجع الوسط الرياضي بخبر وفاة إبراهيم شيكا، لاعب فريق كرة القدم الأول بنادي الزمالك السابق، متأثرا بإصابته بالسرطان. وعاش شيكا خلال الفترة التي سبقت وفاته، رحلة معاناة بسبب إصابته بالمرض اللعين.
ووصل إبراهيم شيكا إلى مرحلة متأخرة من مرض سرطان المستقيم، وهو أحد الأمراض التي قد لا تظهر أعراضها في مراحلها المبكرة، لكنه يصبح أكثر وضوحًا وخطورة مع مرور الوقت، ما جعله يخضع للعلاج المكثف في المستشفيات.
ماذا قال إبراهيم شيكا في آخر ظهور له؟
في فبراير 2024.. ظهر عبر برنامج «اللعيب»، في بداية تعبه، وقال شيكا خلال هذا الظهور: «في شهر 10 اللي فات، كنت أعاني من (إمساك) ورحت كشفت والطبيب كتبلي علاج أمشي عليه لمدة أسبوع، وحصل بالفعل ولكن محصلش أي تحسن في حالتي، ولما كشفت تاني أبلغني
إني محتاج عملية، وبالفعل خضعت لعملية جراحية في إحدى المستشفيات بالقليوبية، بسبب وجود شروخ في (الشرج) بعد أول أسبوع كانت الدنيا تمام، وبعد كدة عانيت بسبب النزيف والصديد لمدة شهر ونص، وكنت بضطر آخد مسكنات علشان أنام من شدة الوجع والتعب».
وأضاف: «ناس تانية قالتلي أروح لجراح تاني، وطلب مني عمل رنين على المستقيم، وطلع إن في ورم، وطلب عينة من الورم بالمنظار، وتأكد إن الورم خبيث مش حميد، من هنا الدنيا بدأت تتحول، ونفسيا أتعب، وفي دكاترة قالتلي إن ممكن يتحول ليا مسار دايم وتتلغي فتحة الشرج نهائيا».
وتابع: «كابتن ياشر شبل من نادي طلائع الجيش وداني مستشفى المعادي العسكري، وهناك قالولي الدنيا تمام، وهانكشف وهتعالج على نفقة الدولة، ومشيت في الإجراءات، وأنا من كتر الألم بمشي بالعافية، وفي ناس برا الرياضة بتساندني، ومحدش من الناس اللي قريبة مني في المجال، محدش اتصل عليا، وأنا ماتصلتش بيهم بالفعل، وأكيد الموضوع وصلهم».
وزاد: «مكتب وزير الرياضة كلمني وحددلي معاد، ورحت بالفعل وهو مشكورا جابلي دكتور من معهد الأورام، وكان المفروض في اليوم ده أروح أعمل فحوصات، في نفس الوقت كانت الدنيا في مستشفى المعادي ماشية كويس، وقولت للوزير لو يوصي الناس عليا هناك مع أنهم قايمين بالواجب، يبقى كويس، وهو قالي تمام، والدكتور بلغني إني لازم يتوفرلي سكن قريب من المستشفى، علشان حالة التعب اللي بعد الجلسات».
في أغسطس 2024، ومع تدهور حالة اللاعب الصحية، حل ضيفا على برنامج «+90»وقال إبراهيم شيكا، «أنا ماشي حاليًا على بروتوكول علاج كيمياوي، لتصغير حجم الورم، ممكن في مرة يكون معايا فلوس أدفع ثمن جرعة الكيماوي، وفي جرعة تانية ممكن أبيع حاجة من البيت عشان أكمل الفلوس».
وأضاف: «أنا متجوز وعندي طفلين، ومطلوب مني إيجار شقة وأكل وشرب ومصاريف الطفلين، وأنا مش بعرف اشتغل بسبب جلسات الكيماوي، ومطلوب مني ده كله».
وتابع باكيًا: «محدش وقف جنبي وكله باعني، أنا 75% من علاجي نفسيًا، فجأة كله باعني»، مضيفًا: «مفيش جنيه طلعلي من نادي الزمالك مع إني سمعت كلام من زملاء ليا إن لعيبة الزمالك اتكلموا مع بعض وهيطلعولي حاجة، مفيش حد فيهم حتى قالي ألف سلامة عليك».
واستكمل إبراهيم شيكا: «أنا كنت سمعت قبل مباراة الزمالك الأولى في الكونفدرالية إن زيزو، اتكلم مع اللعيبة في أوضة اللبس وقالهم (لازم نعمل حاجة عشان إبراهيم شيكا) كنت منتظر بعد المباراة الأولى في الكونفدرالية حد يكلمني من اللعيبة لكن مفيش حد كلمني».
وفي فبراير 2025، ومع تمكن المرض منه: «كل يوم بسمع إشاعات وكلام فقط عن ناس بتساعدني، والكلام ده مش صح، والوسط الرياضي مش مهتم بيا، على عكس الفنانين، والنجمة وفاء عامر وقفت جمبي كتير».
وفي شهر رمضان المبارك الماضي، ظهر شيكا عبر برنامج «مدفع رمضان»، وظهر راقدا على فراشه، وقال: «دعوات الناس ليا هي اللي موقفاني على رجلي ومخلياني قادر اتحمل التعب، وربنا زي ما بيدي الداء بيدي الدواء».
