علق الإعلامي عمرو أديب على زيادة أسعار البنزين والسولار الأخيرة التي أعلنت الحكومة عن تطبيقها بدءً من الجمعة 11 أبريل 2025.
وقال أديب، خلال برنامجه الحكاية عبر شاشة mbc مصر، مساء الجمعة، إن زيادة أسعار المحروقات مزعجة جدًا للمواطنين، متابعًا: زيادة أسعار البنزين والسولار مزعجة للناس، ومحدش كان متوقع تبقى بالحجم ده، إيه السبب طالما كنت تقدر تأجلها؟!.
وأضاف: يعني المواطن في العالم كله ينعم بنزول سعر البترول، والمواطن المصري يدفع فلوس أكتر؟!.. ولما الدولار يزيد هترفع السعر تاني؟.
ووصف الإعلامي قرار زيادة أسعار المحروقات بأنه غير صحيح، قائلًا: قرار زيادة البنزين والسولار والأنابيب مش صح والأرزاق على الله المواطن والناس يا جدعان نفسي أعرف كيف يفكر من اتخذ هذا القرار؟! ألم يفكروا في حجم هذه الزيادة، ألم يشعروا بكلفة ذلك من المواطن.
وتابع: لما تزود السولار 2 جنيه كل حاجة هتزيد، نقل بضائع ومواصلات، والأنبوبة اللي زادت 50 و100 جنيه، المواطن المصري هيعيش ازاي!؟.
وبين أن الدولة لا زالت تدعم السولار رغم الزيادة الأخيرة، موضحًا: السولار لسه قدامه لغاية 20، الحكومة عايزاه يلمس الـ 20 جنيه.
وتساءل أديب، عن سبب عدم تقسيم الزيادة على الـ6 أشهر المقبلة، قائلا: عارف إننا متفقين مع الصندوق على زيادة البنزين والسولار، بس ليه مش بالتدريج؟
ولفت إلى أنه وفق تصريحات الحكومة فإن هناك زيادتين أخريين خلال الأشهر المتبقية من العام، بخلاف الزيادة الحالية، متابعًا: المصريين جدعان وبيتحملوا.. انت شغلتك كيف تعالج الأزمة والموضوع ده هيتكرر مرتين كمان، ولا ناوي المرة الجاية تزود 4 جنيه في وشي.
