علق أحمد حسام ميدو نجم نادي الزمالك ومنتخب مصر السابق، على مخاوف جمهور الأهلي على فريق الكرة الموسم المقبل، مؤكدًا أن الجمهور لديه الحق في القلق على الفريق.
وقال ميدو في تصريحاته تليفزيونية على شاشة «أون تايم سبورتس»: «جمهور الأهلي لديه كل الحق في القلق على الفريق، ولكن ليس بسبب مباراة السوبر الإفريقي أمام الزمالك إنما كتكوين فريق».
وأضاف: «الأهلي خسر محمد عبدالمنعم ولكن جاب أشرف داري، هو لعيب كبير ولكن محتاج وقت عشان يخش في الفرقة، وبالتالي الأهلي عمل شغلته في المركز ده».
وأكمل ميدو: «الأهلي عنده علي معلول مصاب وجاب يحيى عطية الله واحد من أحسن اللاعبين في القارة السمراء، ولكن حتة الانسجام مش بتيجي من يوم وليلة، وعلي معلول نفسه كان أول ماتش أمام بتروجيت وحش جدًا».
وأردف: «وبالنسبالي أشرف داري وعطية الله هيقدروا يعوضوا منعم ومعلول مفيش مشكلة بنسبة كبيرة، مع المباريات والانسجام الأهلي مش هيحس بفارق».
وزاد: «الحتة اللي تقلق جماهير الأهلي إن اللاعيب الوحيد في وسط الملعب اللي عنده إبداع هو إمام عاشور، ده يعمل مشكلة لـ إمام نفسه لأنه محتاج لعيبه تنافسه، وتعمل مشاكل في المباريات الكبيرة قصاد الفرق اللي عندها كثافة دفاعية».
وواصل نجم الزمالك السابق: «أكرم توفيق من لاعب وسط هجومي، هو وسط دفاعي يتنافس مع مروان عطية، ولكن أكرم ميعملش الحتة بتاعت الزيادة العديدة للأهلي مش بتاعته».
ونوه: «أكبر غلطة الأهلي عملها أنه مستعدش قوته تاني من إعاراته، يعني طلع أليو ديانج إعارة وهو مش لاعب مبدع ولكن لاعب قوي جدًا في وسط الملعب».
وأردف: «أنا مش فاهم ليه الأهلي مرجعش أحمد القندوسي من تاني، والتفسير الوحيد ليا أن كولر مش مقتنع بيه، ولكن كان لازم يبقى فيه لعيب وسط ملعب هجومي مع إمام عاشور».
وأتم أحمد حسام ميدو تصريحاته قائلًا: «الأهلي لازم يمضي مع لاعب في مركز الجناح مع حسين الشحات وبيرسي تاو، ويبقى لعيب جامد بيلعب في الناحيتين».
