تنظر محكمة جنح الشيخ زايد، اليوم السبت، أولى جلسات محاكمة لاعب النادي الأهلي إمام عاشور في اتهامه بالتعدي على فرد أمن بأحد المولات عمدًا فأحدث إصابته بالقدم اليسرى والتي أعجزته عن العمل مدة لا تزيد غن 20 يومًا خلال مشاجرة، إثر اعتقاده بأن هناك أشخاص تحرشوا بزوجته لدى تواجدها بالمكان مع أقاربها.
إحالة إمام عاشور إلى المحاكمة
وفق قرار الإحالة إلى المحاكمة، فإن الواقعة التي دارت أحداثها في 19 يونيه الماضي، لم تشهد التحرش لفظيًا بزوجة إمام عاشور إذ لم تثبت لعدم وجود أدلة، وعقب سماع أقوال 5 أشخاص قالت المدعية إنهم تعرضوا لها بألفاظ خادشة للحياء، تبين أن «الخامس» لم يكن متواجدًا بمكان الأحداث بقاعة إحدى السينما، حيث حضر بعد حدوث المشاجرة محل التحقيقات.
وأسندت نيابة الشيخ زايد، برئاسة المستشار إيهاب العوضي، لـ لاعب الأهلي اتهامًا بالتعدي بالضرب على فرد أمن ويُدعى «عبدالله.م» دون استخدام آلة حادة، باستخدام الأيدي والقدمين.
نص اعترافات إمام عاشور أمام النيابة العامة
وقال إمام عاشور خلال التحقيقات، إنه تلقى اتصالًا من زوجته ياسمين حافظ، في الـ4 صباحًا يوم 19 يونيه الماضى، وشرح له إن هناك شباب تحرشوا بها لفظيًا بالمول محل تواجدها، وإن شقيقها (معاذ) كاد يشتبك معهم وطلبت منى التحدث إليه لتهدئته، مضيفًا: «مراتي مقالتليش اللي حصل بالضبط إن حد عاكسها بس (معاذ) قالي إن فيه واحد كان لابس جلابية مقالوش لونها إيه«.
وعن كيفية التعرض لزوجته، رد لاعب الأهلي، على سؤال النيابة، قائلًا: «معرفش هما بس قالوا لي إن فيه حد عاكسها، وأنا حضرت علشان أعرف فيه إيه»، لافتًا إلى أن شقيق زوجته «قالي إنهم مجموعة شباب واحد منهم لابس جلابية».
بشأن رده فعله حين استمع لـ«معاذ»، قال إمام عاشور للنيابة: «كلمت (عمر)، أخو زوجتى الكبير، وقولتله يبلغ مشرفين الأمن يتحفظوا على الشباب دي وأنا جاي علشان أعمل محضر، وفعلًا حضرت وكان معايا واحد صاحبى، وقابلت أخو مراتى الصغير
وأخدته معايا ونزلت الجراج اللى قالى إن الأمن متحفظين فيه على الشباب اللى عاكسوا أخته، فلقيت زحمة كثير من الجمهور كانوا ماشيين ورايا ساعة ما دخلت المول، وكنت بسأل على الشباب إنه المفروض الأمن متحفظ عليهم وملقتهمش فسألت بتوع الأمن».
وأشار إمام عاشور في أقواله عن تفاصيل واقعة التعدي على فرد الأمن، قائلًا: «كنت بقول هما فين هما فين وبزعق وساعتها مشرفين الأمن قالولي أنت بتزعق ليه إنتم المفروض متحفظين على شباب عاكسوا مراتي هما فين طبعا
محدش رد عليا، وكذا واحد من مشرفين الأمن طلعوا تليفوناتهم، وأنا بتكلم وبيصوروني وقولتلهم إنتم بتصوروني ليه وحصل ازدحام في اللحظة دي، وأنا مشتبكتش مع حد فيهم وبدور وشي لقيت (عبدالله) واقع على الأرض ومشوفتش
(عبدالله) غير وهو واقع على الأرض وأول ما شفته واقع على الأرض انا جريت عليه ولما وقع على الأرض انا قلعته الجزمة وبحاول أفوقه وفاق بعدها علطول وقولت للناس بعد إذنكم يا جماعة وسعوا علشان الراجل اللي وقع ياخد نفسه».
واختتم قائلًا: «ولما قام وفاق قعد يقولي انه عنده اسرة واولاد وعايزك تساعدني والموضوع انتهي واخدت بعضي ومشيت والراجل اللي وقع اللي اسمه عبدالله بقي كويس واخدت مراتي واهلي وكانوا مستنيين بره المول وروحنا، واتفاجئت لما روحت أن فيه خرابيش في إيدي من الزحمة والزق ومراتي قالتلي أنت ساكت ليه متعمل قضية قولتلها أنا مش عايز اؤذي حد».
لا توجد مساعِ للصلح
وكانت النيابة قررت إخلاء سبيل إمام عاشور لاعب النادي الأهلي بكفالة 5 آلاف جنيه، عقب التحقيق معه في اتهامه بالتعدي على فرد أمن في مول أركان بالشيخ زايد.
من جانبه، قال دفاع المجني عليه، إن سيطالب بتوقيع أقصى عقوبة على لاعب الأهلي وتعديل القيد والوصف وإضافة اتهامات جديد لـ إمام عاشور، لافتًا إلى عدم وجود مساعِ للصلح حتى الآن.
