دشن رواد مواقع التواصل الاجتماعي هاشتاج "لا تستعملوا أوبر"، وذلك بعد تكرار حوادث التحرش، حيث قام سائق بخطف فتاة وحاول اغتصابها يوم السبت الماضي، ويأتي الحادث بعد واقعة حبيبة الشماع .
سمر فودة إبنة الكاتب والمفكر الدكتور فرج فودة :" موضوع الأوبر بجد خطير .. طول عمري برفض تماما ان بنتي تركبه و كانت تقولي يا مامي اصحابي بيركبوه عادي اقول لها مستحيل .. كنت انزل اجيبها من آخر الدنيا بس المهم متركبش اوبر .
المرة الوحيدة اللي وافقت انها تركب اوبر كان من اكتر من سنة مع 6 من اصحابها ( من ضمنهم ابن عمها ) كانوا راجعين من التجمع حفلة لعمرو دياب في الجامعة الاميريكية .. قلت مش مشكلة معاهم 3 اولاد و بنتين كمان و من ضمنهم ابن عمها فان شاء الله خير و امان.
عارفين ايه اللي حصل ؟!! اخدهم في حتى بعيد ناحية حلوان و صحراء و نزل الولاد ( الذكور ) و قالهم لو مدفعتوش ليا الف جنيه هسيبكم هنا .
الولاد لموا من بعض و دفعوله و قبلها كانوا باعتين live location لدفعتهم كلها علشان لو اتخطفوا يعرفوا هما فين، المنطقة اللي اخدهم فيها كان مفيش فيها network هما بداوا يبعتوا لبعض لما لقوا انه بيمشي في اماكن غير اللي على الخريطة، كانت اول و آخر مرة اوافق ان بنتي تركب اوبر .. لو سمحتم بلاش .. خصوصا البنات.
#اوبر
#سمر_فرج_فودة
محمد طه : انك تلغي أوبر من تليفونك هتجبر مجلس اداره الشركة انه يجتمع و يقرر قرارات تفيدك و تفيد اهل بيتك زي عمل تحليل دوري للمخدرات على جميع السائقين و انشاء غرفة عمليات للشركة لمتابعة خط سير الرحلات بكل
دقة ووضع شرط اساسي عند التعيين وهو تركيب كاميرات داخل السيارات و ربطها بغرفة العمليات على مدار ال 24 ساعة و وتركيب فاصل داخل السياره بين السائق و الراكب و عمل اختبارات لقياده السياره قبل التعيين و عمل كشف
جنائي دوري( فيش و تشبيه) لجميع العاملين وو ضع معايير للتعين كما هو متعارف عليه لنفس الشركة عالميا و عمل معيار للاستغاثة داخل ال application عن طريقها يستطيع الراكب التعبير عن تعرضه للخطر و إرسالها لغرفة العمليات.
وربط جميع الرحلات لاسلكيا بغرفة العمليات و عمل كشف فني للسيارت بشروط حازمة و عمل لجان تفتيش مفاجئه من الشركة على السائقين اثناء الرحلة و التأكد من تنفيذه لجميع الإجراءات.
وتعميم هذه القرارت على جميع الشركات من هذه النوعية و بكده هتجبر الشركة انها تحترم العميل المصري ووضعه في الخانة الصحيحة و هنقدر نطمن على ولادنا و بناتنا و اهل بيتنا حفظكم الله جميعا من كل شئ
#Uper
UBER MISR - أوبر مصر
@Uber
جريدة صدى حلوان : ماتركبوش اوبر يا جدعان مهما كانت الظروف اللي انتو فيها ومهما كان المكان اللي عايزين تروحوه بلاش اوبر و خافو على نفسكوا.
بعد حادثه حبيبه الشماع الله يرحمها دي بنت تانيه ضحيه لسواق من اوبر، البنت اختها طلبتها اوبر من زايد و فجاه الراجل خطفها طلع سلاح أبيض عايز يغتبصها البنت قاومت مسكت المطوه بايديها و كانت بطله حقيقيه أنها مخافتش و كان عندها الشجاعه أنها تهرب منه بعد ما اتعورت و في الاخر رماها في الصحرا و هرب.
الراجل اتقبض عليه و هياخد جزاءه بس لحد امتى شركه اوبر هتبقا بالقرف دا لحد امتى البنات لازم تموت لحد ما شركه اوبر تتحمل مسؤوليه الناس اللي شغاله عندها.
انتي الاهم : نبيلة عوض فتاة التجمع في مواجهة سائق أوبر : هو ده اللي خطفني وحاول يعتدي عليا.
لا رقابة
لا ضوابط
لا معايير في التوظيف
لا حساب
لا تأهيل
لا ميل
قاطعوا شركة أوبر في مصر بناتنا في خطر
#أنتي_الأهم
#أوبر
#stopusinguber
#entyelaham
@sallyness_
@uber
-محدش يركب اوبر تاني بجد ، كل يومين جريمه غير التانيه خافوا ع نفسكوا يا بنات
مقاطعه اوبر .
ورأت رانيا جلال انه لا يجب التغافل عن السائقين المحترمين المنضبطين، الذين ضد جرائم التحرش، وكتبت :" كلمه حق، ايوه فيه حادثتين حصلو في #اوبر بس كمان ما ننكرش ان فيه قدامهم مليون واحد بيتحرك باوبر وشايفها منتهي الانضباط ووسيله سهلت علينا الحركه .. صاحبتي لسه بتقوللي بنتي بقالها سنين بتروح الشغل وبترجع باوبر ومرتاحه كده جدا.
الفكره نفسها هايله يبقي نحاول نعمل حاجه تضمن امانها بقي.. يعني ممكن نطلب مراقبه الرحله .. نطلب ان السائق يتعمله باستمرار تحليل مخدرات ..فيه كمان مسئوليه علينا اننا نتابع بناتنا يعني اللي تركب عربيه ممكن تفتح الكاميرا فاهلها يتابعوها .. بس حرام نندفع ونظلم سواقين اوبر كلهم ونطلب منعها ونقطع عيشهم .
اسلام : تمام يتعاقب اكيد بس انت كده عممت علي الكل وفي ناس مصدر واكل عيشها من الشغلانه دي معاك يكون في قانون راضع لده بس كلامك ميتعممش لانك كده بتقفل بيوت ناس كتير راجع كلامك تاني.
محمد : المشكلة مش في اوبر او اي شركة تانية او في التاكسي العادي او اي وسيلة مواصلات تانية , المشكلة في حالة انهيار المجتمع نفسه , يعني لو مثلا اوبر اتعاقبت واتسحب ترخيصها , طيب هما سواقين التاكسي العادي او سواقين الشركات التانية ما بيشربوش مخدرات ؟ مفيش فيهم متحرشين.
الحل ان يبقا في انظمة مراقبة صارمة , الحل ان السيارة تستخدم لتوصيل الناس لازم تكون مرتبطة بغرفة مراقبة مركزيه تتابع كل شيء بالصوت والصورة وخط السير , الحل انه تتعمل لجان تفتيش توقف العربيات والتاكسيات في الشوارع بشكل مفاجئ وعشوائي , ويتعمل
لهم تحليل مخدرات سريع وعشوائي في اللجنة و اللي يثبت تعاطيه بتعاقب عقاب شديد و فوري، مفيش مشكلة مالهاش حل , لكن الحلول لازم تكون جذرية على مستوى المنظومة كلها , لكن طول ماهي ماشية بالمسكنات والتلزيق مفيش حاجة هاتتحل , و هايفض الوضع من سيء لاسوأ .
